Obeyi, Kwè

Ala yon bèl jou jodi a ye!

Se pa ti kontan non m pa kontan jodi a. Mwen rejwi nan kè m e m ap di Bondye mèsi ki kenbe m fèm san m pa tonbe paske se pa tout moun ki t al dòmi nan kabann yo yèswa ki leve maten an. M ap priye pou m kontinye kenbe fèm nan Kris san lage jouk lavi m fini.

Lè m pran kalkile sou fason legliz mwen an Ayiti te konn chante Lè n ap mache ak Dye nan limyè Pawòl Li, m panse ak mo sa yo anpil e m di Bondye mèsi pou enstriksyon mo sa yo pote nan kè mwen. 

"Lè n ap mache ak Dye nan limyè Pawòl Li

Ki bèl glwa Li voye sou wout nou

Lè n ap fè volonte L, Li rete kote nou

E ak tout moun ki obeyi, kwè.

Obeyi, kwè, se tout sa pou nou fè

Pou nou kontan nan Jezu, se pou n obeyi, kwè."

Men, kisa menm pou nou obeyi a? 

Kisa pou n kwè a? 

Kisa menm ki responsabilite tout moun ki di y ap mache ak Bondye? 

Ak ki mezi Bondye sèvi pou L wè si tout bon vre n ap mache ak Li?

Ebyen, lespri fouyapòt mwen an voye m al li Miche 6:6-8 ki di konsa,

“Kisa m a pote bay Senyè a, Bondye ki nan syèl la, lè m a vin adore L? 

Eske m a pote pou li yon jenn ti towo bèf 

ki fèk gen ennan pou yo ka boule pou Li? 

Eske Senyè a ap kontan 

si m pote ba li mil belye mouton ak di mil barik lwil? 

Eske m a ofri premye pitit gason m nan 

pou peye pou sa m fè ki mal? 

Eske mwen ka pran fwi zantray mwen 

pou m bay pou kouvri peche mwen? 

Senyè a te montre w, monchè, tout sa ki byen. 

Tout sa Li mande w, 

se pou w fè sa ki dwat, 

se pou w renmen mizerikòd, 

se pou w mache san lògèy devan L.”

Pwen final. 

Pa gen anyen ankò. 

Si se sa sèlman pou n fè, pou ki rezon nou konplike bagay yo konsa ak yon bann règ lezòm vin ajoute sou sa Bondye te bay? Petèt se rezon sa ki fè anpil moun rayi legliz ak moun k al legliz?

Responsabilite sa a Bondye bay la difisil anpil pou nou reyalize paske nou pa ka fè l pou kont nou. Men, ak gras Bondye, Kris te trase yon bèl wout devan nou ak san Li k te koule. Li peye dèt peche nou yo e L vin fè nou tounen zanmi L nèt al kole.  San rete, san kanpe, puisans Li kontinye transfòme nou detanzantan pou nou ka vin fè bon zèv ki devwale karaktè Bondye daprè sa Efezyen 2:8-10 di nou. 

Annou kontinye remèt lavi nou nan men L, annou kouri kite chemen kwochi, annou renmen mizerikòd e pratike kè sansib, annou mache san lògèy devan L, ann fè lwanj Li chak jou Bondye mete!

Tanpri, Papa, beni pitit ou yo jodi a e ankouraje nou anpil, anpil ak fòs lamou Ou. Ede nou tou pou n ka renmen W ak yon lamou ki sot byen fon nan kè nou dekwa pou nou ka mache byen dwat devan W e ba W glwa chak jou. Nan non Jezu, nou priye. Amen!

Goute Jezu

“Jezu bon, mwen santi L nan tout kò mwen, 

Jezu bon, mwen santi L nan tout zo mwen . . .”

Sa se te yon chan m te konn koute sou Radio Lumière lè m te timoun e jouk kounye a ti melodi sa a vin nan tèt mwen tanzantan.  M pa sonje ki gwoup evanjelik ki te konn chante l, men anpil fwa m poze tèt mwen kesyon eske tout bon nan tout aktivite m yo m aji daprè mo chan sa yo? Si Jezu bon tout bon, eske m pran tan m pou m goute L, pou m manje L, pou m leche bouch mwen,  pou m wè jan Li bon? Pawòl Bondye di nou konsa nan Sòm 34:8a, 

“Goute, epi w a wè jan Senyè a bon.”

Tout moun ki aprann fè manje nan peyi nou ka di yo pa ka fè manje san yo pa goute. Pou mwen, gen kèk fwa m tèlman goute manje a lè l fin kuit m pa grangou ankò.  Men m pran tout tan m anvan l kuit pou m wè si l gen sèl, si l gen bon gou, si l gen tout epis m vle yo paske m vle manje a bon.  Moun ki pa fè manje a epi ki vin goute l egzakteman anvan nou mete manje a sou tab, se moun sa a ki byen goute.   

Ebyen, Jezu se yon manje ki byen prepare; se sèlman vini goute L.  Lè m pran san m pou m kalkile sa k pase nan lavi m deja, mwen wè anpil fason Bondye montre m jan Li bon pou mwen.  Si pou m ta rakonte tout, m pa t ap janm ka fin ekri jodi a.  Men, m gen yon ti pòsyon m ta renmen pataje avèk nou.

Depi m te tou piti m te toujou anvi jwenn yon moun ki te ka tounen pi bon zanmi m.  Yon moun ki te ka konprann mwen tout bon, ki te ka aksepte m jan m ye a, ki te ka souri epi kriye avè m nan bon tan e nan move tan.  

Anpil fwa m jwenn kèk moun ki rive byen pre men lè m deside lage tout mwen nèt nan Bondye, se lè sa a m vin wè tout bon se sèl Jezu ki pi bon zanmi m vre.  Lè m santi m fin dekouraje nèt, se Li ki fè m reprann tout fòs mwen ankò.  

M sonje lè m te fèk antre nan Eastman School of Music, m te konn toujou ap panse se mwen ki pi mal nan tout tenò ki te la yo paske chak fwa te gen yon prezantasyon espesyal, se te lòt moun pwofesè yo te konn chwazi pou chante. M te konn dekouraje anpil.  Se nan epòk sa yo m te vin kòmanse ap memorize liv Kolosyen.  Chak vèsè m aprann nan liv la pran kè m epi l moulen l jouk li vin mou ase pou l resevwa verite Bondye te vle revele m nan. 

M te vin konprann e aksepte se sèl Jezu ki ka konprann mwen e renmen m tout bon, tout bon. 

"Pa gen yon lòt ki renmen m kon Li;

Li konnen tout sa ki nan kè mwen.

Pi bon zanmi mwen genyen se Jezu;

Pa gen yon lòt kon Li!"

Aprè 2 premye ane m yo nan Eastman, m te tèlman vin gen chans pou m chante, m te vin bouke chante pou tout aktivite k te genyen yo.  Epi nan fen ane akademik 2006-2007 la, m te vin resevwa premye pri nan tout etidyan doktora yo. M te vin wè vre se Jezu tout bon ki te ka fè sa pou mwen. 

Liv Kolosyen transfòme lavi m e kounye a se yon lòt moun nèt mwen ye. Mwen sispann chache yon pi bon zanmi sou latè. Kounye a sa m ap fè, se imite m vle imite Jezu dekwa pou m ka tounen yon bon zanmi ki ka mennen lòt moun vin pi pre Jezu.

Tanpri Papa, pa kite m bliye ti koze sa a -- Jezu se pi bon zanmi m te ka genyen. Ede m pou m goute L chak jou e wè kijan Li Bon!

Devlope Sajès

Bonjou!

Ala yon jwa mwen gen nan kè m jodi a pou m koze avèk ou. M swete w santi w byen nan jounen sa a anba pwoteksyon Papa Bondye.

Youn nan bagay ki mete anpil rekonesans nan kè m pou manman m ak papa m se memorizasyon plizyè chapit nan liv sòm yo. Chak fwa m rive nan yon moman nan lavi m kote m anvi gaye pye m e kite wout Bondye trase devan m, sòm sa yo toujou pase nan tèt mwen e drese m byen dwat pou m tounen sou wout syèl la ankò. Tou dènyèman, genyen youn nan yo ki vin ap pase nan lespri m anpil, se sòm 90. M sonje jan m te konn resite l ansanm ak frè m ak sè m yo lakay la sitou lè nou pa t gen anpil tan devan nou pou devosyon.

Ebyen, sòm 90:12 di konsa,

“Ansenye nou pou nou byen konte 

jou W ban nou yo pou n viv sou latè, 

dekwa pou n ka devlope sajès nan kè nou."  

Lè vèsè sa a byen antre nan tèt mwen, li fè m reflechi anpil sou lavi m depi m te tou piti rive kounye a.  Lè m te konn resite sòm 90 pakè, m te konn fè sa nan lang fransè.  Nan epòk sa a, sa k te vrèman enterese m se pou m te pwononse mo yo pi byen pase tout moun.  Aprè m te wè jan 2 bon zanmi m te vin mouri, sòm 90 te vin mete anpil perèz nan mwen paske m te vin konprann lavi nou kout anpil sou tè sa a. Men kounye a, m pa enterese ni nan pwononse mo yo byen, ni nan pè lanmò paske m vin reyalize Bondye gen yon objektif byen detèmine Li vle fè nou konprann -- kè Li dezire ban nou sajès. 

Sajès fè m konprann yon prensip Satan vle fè tout kretyen bliye.  Bondye te kreye nou pou tout letènite men lavi nou sou latè brèf paske se sa nou fè sou latè ki detèmine jan n pral viv nan letènite ak Kris.  M vin konprann chak aksyon m poze enfliyanse wayòm syèl la swa an byen ou an mal. Bondye fè m wè se gras Li fè m lè L pa kite m viv yon vi ki long tankou Methuselah paske peche m yo tèlman anpil nan trannsètan (37) sa m gen tan pase sou latè, m pa ka imajine ki gwosè montay peche m ta ka rive pou m ta viv plis pase 900 ane.  Sa vle di, chak pa mwen fè dwe reflete vizaj Jezu e chak sa m akonpli dwe sèvi tankou yon envestisman nan wayòm Bondye k ap vini an.  

Lè m chante, se pou m chante pou Li. 

Lè m sèvi ak lajan m bezwen mande tèt mwen eske se sa Bondye vle m fè ak kòb Li ban mwen an. 

Lè m bay blag, eske mo m ap di yo se mo k ap fè wayòm Bondye a pwogrese oubyen fè bak? 

Lè m sou entènèt, eske sa m fè yo ba L glwa oubyen non? 

Lè m kite bon opòtinite pase san m pa aji pou Kris, eske se pa gaspiyaj m ap fè ak jou L ban mwen yo? 

Lè m kite anpil tan pase san m pa envesti nan relasyon Bondye ban mwen yo, tankou fanmi ak zanmi, eske m vrèman montre inyon Bondye mande nou pou nou genyen?

Bondye di yon jou L ap mande n regleman sou jan nou travay. Ebyen, m ap ankouraje nou tout sou latè pou nou panse ak pawòl Li nan tout sa n ap fè. 

Ann viv ansanmm nan kominyon dou; ann mache nan limyè!